Old Blind Dogs The Birkin Tree Lyrics

Oh lass, gin' ye would think it right
Tae gyang wi' me this very night
We'll cuddle tae the mornin' light
By a' the lave unseen O
And ye will be my dearie
My ain dearest dearie
It's ye will be my dearie
Gin ye meet me at e'en O

I canna for my mammy gae
She locks the door and keeps the key
And in the mornin' charges me
And aye aboot the men O
For she says they're a' deceivers
Deceivers, deceivers
She says they're a' deceivers
Ye canna trust ane O

Oh nivver min' yer mammy's yell
Nae doot she met yer dad hersel'
And should she flyte, ye can tell her
She's aft times done the same O
So lassie, gie's yer hand on't
Yer bonnie milk-white hand on't
Lassie, gie's yer hand on't
And scorn tae lie yer lane O
Oh lad, my haun' I canna gi'e
But aiblins I man steal the key
And I'll meet ye at yon birkin tree
That grows doon in the glen O
But dinna lippen, laddie
I canna promise, laddie
Oh dinna lippen, laddie
In case I canna win O

So he's gaen tae the birkin tree
In hopes his ain true tae see
Fa come trippin' ower the lea
But just his bonnie Jean O
And she's clinkit doon beside him
Beside him, beside him
She's clinkit doon beside him
Amangst the grass sae green O

"I'm overjoyed wi' rapture noo"
Quo' he, and preed his cherry moo'
And Jeannie ne'er had cause tae rue
That nicht upon the green O
For she has got her Johnny
Her ain lovin' Johnny
It's she has got her Johnny
And Johnny's got his Jean O
1