Al Andaluz Project Letra de "Un Sirventes Novel"

Un sirventes novel vueill comensar
Que retrairai al jor del jujamen
A sel que-m fes e-m formet de nien
S'el me cuja de ren arazonar
E s'el me vol metre en la diablia
Ieu li dirai: seinher, merce, non sia
Qu'el mal segle tormentiei totz mos ans
E guardas mi, si-us plas, del tormentans

Tota sa cort farai meravillar
Cant auziran lo mieu plaideiamen;
Qu'eu dic qu'el fa ves los sieus faillimen
So los cuja delir ni enfernar
Car qui pert so que gazanhar poiria
Per bon dreg a de viutat carestía
Qu'el deu esser dous a multiplicans De retener las armas trespassans

Ieu no me vueill de vos dezesperar;
Anz ai en vos mon bon esperamen
Que me vaillas a mon trespassamen:
Per que deves m'arma e mon cors salvar
E farai vos una bella partia:
Que-m tornetz lai don moc lo premier dia
O que-m siatz de mos tortz perdonans
Qu'ieu no-ls fora si non fos natz enans

Per merce-us prec, donna sancta Maria
C'al vostre fill mi fassas garentia
Si qu'el prenda lo paire e-ls enfans
E#ls meta lay on esta sans Sohans